Sefydliadau lleol yn herio’r tywydd i godi arian ar gyfer digwyddiad Big Sleep Out blynyddol Tai ClwydAlyn

Mewn ymdrech ar y cyd i godi ymwybyddiaeth am ddigartrefedd a chodi arian ar gyfer gwasanaethau hanfodol, fe wnaeth aelodau staff, ynghyd â rhai o’u plant, o sefydliadau ClwydAlyn, Ambiwlans Awyr Cymru, DHL Logistics ac Enhanced Medical gymryd rhan yn 11fed digwyddiad blynyddol Big Sleep Out Tai ClwydAlyn. Cynhaliwyd y digwyddiad nos Sadwrn, 12 Hydref, rhwng 9pm a 6am, a daeth pawb ynghyd ym mhrif swyddfeydd ClwydAlyn yn Llanelwy i gysgu allan am y noson.

Fe wnaeth Matthew Davies, aelod staff ClwydAlyn, gofnodi’r digwyddiad ar ffurf dyddiadur fideo, gan dynnu sylw at arwyddocâd ac effaith yr ymgyrch.

Dyddiadur fideo digwyddiad blynyddol Big Sleep Out ClwydAlyn gan Matthew Davies

Dyma’r pedwerydd tro i mi gymryd rhan yn ymgyrch Big Sleep Out, a bob blwyddyn rwyf yn synnu pa mor heriol yw gwneud hyn. Er ein bod yng nghanol tymor yr hydref, roedd yn noson hir a thywyll ac yn eithriadol o oer. Mae’n brofiad sobreiddiol sy’n rhoi cipolwg bach i ni ar yr hyn mae pobl ddigartref yn ei wynebu bob dydd. Rydyn ni’n hynod o ddiolchgar i bawb sydd wedi cyfrannu ac sy’n dal i gefnogi’r achos hwn. Nid codi arian yn unig yw pwrpas y digwyddiad hwn, mae hefyd yn dangos ein cefnogaeth i bobl ddigartref ac yn ein hatgoffa y gall pob un ohonom wneud gwahaniaeth.

Edward Hughes

Cyfarwyddwr Gweithredol Gofal a Chymorth ClwydAlyn

Yn ôl Debra Sima, Rheolwr Codi Arian Rhanbarthol Ambiwlans Awyr Cymru: “Mae Ambiwlans Awyr Cymru yn darparu’r unig wasanaeth ambiwlans awyr yng Nghymru, ac mae angen i ni godi £11.2 miliwn i ariannu’r costau gweithredol bob blwyddyn. Rwyf wedi cymryd rhan yn ymgyrch Big Sleep Out am sawl blwyddyn bellach, mae’n codi arian hollbwysig i Wasanaethau Digartrefedd ClwydAlyn ac Ambiwlans Awyr Cymru sy’n darparu cymorth hanfodol i lawer o bobl bob blwyddyn. Mae’n brofiad gwahanol iawn ond rydym yn ddigon ffodus i ddioddef hyn unwaith y flwyddyn yn unig, yn wahanol i lawer o bobl ddigartref yng ngogledd Cymru. Diolch i bawb sydd wedi cefnogi ein digwyddiad”.

Yn ôl Lynda Williams o ClwydAlyn: “Dros yr 11 mlynedd diwethaf, mae ein gwirfoddolwyr a’n cefnogwyr gwych wedi helpu i godi dros £50k ar gyfer gwasanaethau digartrefedd. Mae’r arian hwn yn hollbwysig, rydym yn darparu cymorth i dros 100 o bobl bob blwyddyn, gan eu helpu i ddod o hyd i rywle sefydlog y gallant ei alw’n gartref yn ein gwasanaethau. Mae digartrefedd yn broblem gymhleth a pharhaus, ond rydym wedi ymrwymo i’r fenter hon gyhyd ag y bo angen. Byddwn yn dal i weithio i sicrhau bod pawb yn ein cymuned yn derbyn y gofal, cymorth a’r urddas maen nhw’n eu haeddu.”

I gyfrannu at yr achos hwn, ewch i dudalen JustGiving ClwydAlyn: 11fed Digwyddiad Big Sleep Out ClwydAlyn ar JustGiving