Y Dirprwy Brif Weinidog yn ymweld â Phenrhyndeudraeth i ddathlu Lansiad y Strategaeth Ddiwydiannol ar gyfer Pren

Croesawyd y Dirprwy Brif Weinidog, Huw Irranca-Davies, i ddatblygiad tai newydd ym Maes Deudraeth, Penrhyndeudraeth, yr wythnos ddiwethaf. Roedd yr ymweliad swyddogol â’r cartrefi ym Mhenrhyndeudraeth yn nodi lansiad Strategaeth Ddiwydiannol ar gyfer Pren Llywodraeth Cymru.

Roedd cynrychiolwyr ClwydAlyn a Grŵp Cynefin ynghyd â’r contractwr Williams Homes ar y safle i’w gyfarfod. Cafodd Mr Irranca-Davies ei dywys o amgylch y datblygiad newydd, sy’n cynnwys 41 o dai a fflatiau effeithlon o ran ynni, sydd wedi’u hadeiladu o fframiau pren.

Defnyddiwyd dulliau adeiladu modern i godi’r holl gartrefi ym Maes Deudraeth; mae hyn yn cynnwys fframiau pren o Gymru. Mae’r ymweliad yn gyfle i amlygu pwysigrwydd y diwydiannau coedwigaeth a phren yng Nghymru. Wrth lansio’r Strategaeth Ddiwydiannol ar gyfer Pren Llywodraeth Cymru, y nod yw hybu’r defnydd o bren o Gymru yn y sector adeiladu.

“Mae pren yn hanfodol er mwyn sicrhau Cymru gryfach, decach a gwyrddach. Mae’r sectorau coedwigaeth, pren ac adeiladu yn cynnig gyrfaoedd amrywiol, gan gynnwys swyddi gwyrdd â chyflogau uchel, sydd hefyd yn ein helpu i fynd i’r afael â’r argyfwng hinsawdd.

“Trwy weithio gyda’r diwydiant, gall Cymru fanteisio i’r eithaf ar y cyfleoedd sy’n deillio o greu a gwerthu cynhyrchion coedwig o goedwigoedd adnewyddadwy, cynaliadwy, sy’n cael eu rheoli mewn ffordd gyfrifol.”

Huw Irranca-Davies

Dirprwy Brif Weinidog gyda chyfrifoldeb dros Newid Hinsawdd

“Rydyn ni’n hynod o falch o ddefnyddio fframiau pren o Gymru yn ein cartrefi newydd ym Mhenrhyndeudraeth. Mae defnyddio cynnyrch lleol yn cefnogi economi Cymru ac yn dangos ansawdd rhagorol a chynaliadwyedd adnoddau naturiol ein rhanbarth.
“Trwy weithio gyda Grŵp Cynefin ar y cynllun hwn, rydyn ni’n creu cymuned gynaliadwy sy’n adlewyrchu cymeriad unigryw’r ardal arbennig hon ac yn cwrdd ag anghenion pobl a theuluoedd lleol.”

Helen Williams

Rheolwr Datblygu Prosiectau ClwydAlyn

“Rydyn ni’n falch iawn o weithio gyda ClwydAlyn i ddarparu cartrefi fforddiadwy y mae angen mawr amdanyn nhw yn y rhan hon o Eryri, gan gyfrannu at darged Llywodraeth Cymru i adeiladu 20,000 o gartrefi newydd erbyn 2026.”

Arwyn Evans

Pennaeth Datblygu, Grŵp Cynefin

“Fel mae pawb yn gwybod erbyn hyn, mae Gwynedd yn wynebu argyfwng tai, ac mae’r galw am dai fforddiadwy yn llawer uwch na’r cyflenwad tai ledled y sir. Trwy weithio mewn partneriaeth â ClwydAlyn, Grŵp Cynefin, a Llywodraeth Cymru, gallwn ddarparu mwy o dai fforddiadwy, o ansawdd, gan alluogi pobl leol i aros, ffynnu, ac adeiladu eu dyfodol yn eu cymunedau eu hunain.”

“Mae sicrhau bod y cartrefi newydd hyn yn cael eu hadeiladu o ddeunyddiau sydd i’w cael yn lleol, fel pren Cymreig, nid yn unig yn cefnogi economi Cymru mae hefyd yn cryfhau ein hymrwymiad i gynaliadwyedd, arloesedd a thwf yn y tymor hir yng Ngwynedd.”

Cynghorydd Paul Rowlinson

Aelod Cabinet Tai ac Eiddo Cyngor Gwynedd

Mae Williams Homes (Y Bala) yn adeiladu’r cartrefi hyn ar ran ClwydAlyn a Grŵp Cynefin ac mewn partneriaeth â Chyngor Gwynedd a Llywodraeth Cymru. Mae’n rhan o Raglen Datblygu Tai Fforddiadwy Gwynedd sy’n ceisio cyflawni nod y Cyngor o adeiladu 700 o dai cymdeithasol ar hyd a lled y sir yn ystod oes ei Gynllun Gweithredu Tai.

I gael rhagor o fanylion am y cartrefi, ewch i: Canol Cae, Penrhyndeudraeth – Clwydalyn

I roi eich barn ar Strategaeth Ddiwydiannol Pren Llywodraeth Cymru, ewch i: Dweud eich dweud ar strategaeth newydd Cymru ar gyfer pren | LLYW.CYMRU