Dechrau Newydd: Teuluoedd yn symud i mewn i’w cartrefi modern, eco-gyfeillgar yn y Rhyl

Ar 2 Rhagfyr, symudodd 13 o deuluoedd i mewn i’w cartrefi newydd ar Stryd Edward Henry yng ngorllewin y Rhyl. Mae’r cartrefi hyn gan ClwydAlyn nid yn unig yn garreg filltir o ran adfywio cymunedol a byw’n gynaliadwy, ond hefyd o ran dyfodol y teuluoedd wrth iddynt ddechrau pennod newydd yn eu bywydau.

Mae’r 13 cartref tair ystafell wely newydd, ar arddull tŷ tref tri-llawr, yn ganlyniad partneriaeth rhwng ClwydAlyn, prif ddarparwr tai cymdeithasol Gogledd Cymru, Cyngor Sir Ddinbych, Llywodraeth Cymru a chwmni NWPS Construction Ltd.

Mae’r prosiect nodedig yn cynnig datrysiadau tai modern ac yn arwain y ffordd ar gyfer dyfodol mwy gwyrdd a chynhwysol wrth i’r cartrefi newydd gymryd lle’r hen stoc tai a oedd yn anaddas i’w hadnewyddu. Mae’r datblygiad yn rhan o Gynllun Trawsnewid Trefi Llywodraeth Cymru, sy’n cynnwys ailddatblygu gorllewin y Rhyl.

Roedd teimlad o obaith ac optimistiaeth wrth i’r teuluoedd cyntaf ymgartrefu yn eu cartrefi newydd. Mae’r cynllun wedi cynnig llety fforddiadwy i deuluoedd y mae dirfawr ei angen yn y Rhyl.

Cafodd rhanddeiliaid allweddol eu gwahodd i ymweld â’r cartrefi arloesol ddydd Mercher, 27 Tachwedd, ac roedd y sylw i fanylion a’r pwyslais ar ddylunio cynaliadwy wedi gwneud argraff ddofn arnynt.

“Mae’r datblygiad yn Stryd Edward Henry yn cynnig cartrefi o ansawdd sy’n cynnwys y systemau gwresogi ac arbed ynni diweddaraf. Mae’r cartrefi newydd hyn yn dod ag ysgafnder a theimlad newydd i’r stryd.
“Bydd y bobl sy’n symud i mewn i’r cartrefi yn cael cyfle i ddechrau pennod newydd yn eu bywydau, gan fyw mewn adeilad o ansawdd uchel. Rwy’n dymuno pob hapusrwydd ac iechyd iddynt ar eu taith ddiweddaraf.”

Dywedodd y Cynghorydd Alan James

Aelod Arweiniol Datblygu Lleol a Chynllunio Cyngor Sir Ddinbych

“Mae’r sylw i fanylion yn y cartrefi newydd hyn yn wirioneddol arbennig, ac mae’r unedau gorffenedig yn gweddu’n dda i’r stryd. Mae’r tai newydd yn hynod o effeithlon, ac yn cynnwys y dechnoleg arbed ynni ddiweddaraf.
“Rwy’n falch o weld bod cyfleusterau gwefru cerbydau trydan yng nghefn yr adeiladau, yn ogystal â mannau parcio.
“Hoffwn ddymuno’r gorau i’r preswylwyr wrth iddynt ymgartrefu yn eu cartrefi newydd, a dymuno pob hwyl iddynt ar gyfer y dyfodol.”

Dywedodd y Cynghorydd Barry Mellor

Aelod Arweiniol yr Amgylchedd a Thrafnidiaeth Cyngor Sir Ddinbych

01 - 02

Mae pump o’r cartrefi yn yr ardal gadwraeth. Mae’r ffasadau wedi’u dylunio a’u hadeiladu i efelychu’r tai tref gwreiddiol ar Stryd Edward Henry yn 1929, pan fu’r arlunydd trefol enwog LS Lowry yma yn creu brasluniau. Mae’r cartrefi hyn yn cynnig safon byw uchel a modern, tra’n gwarchod treftadaeth ac arddull bensaernïol gyfoethog yr ardal.

Dyluniwyd yr holl eiddo ffrâm bren newydd fel ‘cartrefi am oes’, gan olygu y bydd modd eu haddasu i anghenion y preswylwyr wrth iddynt newid, ac mae pob un yn cynnwys ystafelloedd gwlyb hygyrch. Yn ogystal â hyn, mae gan yr 13 cartref bympiau gwres ffynhonnell aer, paneli trydan solar, a lefelau ynysiad uchel ynghyd â chyfleusterau gwefru cerbydau trydan. Mae’r nodweddion hyn yn golygu bod y cartrefi yn ddarbodus i’w rhedeg ac maent yn cyd-fynd â chenhadaeth ClwydAlyn i drechu tlodi tanwydd a lleihau’r effaith ar yr amgylchedd.

“Rydym wrth ein boddau i groesawu 13 o deuluoedd i’n datblygiad ar Stryd Edward Henry. Mae cartref newydd yn cynnig cyfle newydd i bawb sy’n symud i mewn heddiw ac rydym yn gobeithio y bydd y preswylwyr yn hapus iawn yma.
“Mae’r cynllun unigryw hwn yn hollol wahanol i’n datblygiadau blaenorol, ac rydym yn hynod o falch o’r hyn a gyflawnwyd yma yn y Rhyl.”

Craig Sparrow

Cyfarwyddwr Gweithredol Datblygu a Rheoli Asedau

Datgelodd ClwydAlyn fod y broses adeiladu wedi defnyddio contractwyr lleol a defnyddiau cynaliadwy a gyrchwyd yn lleol lle bo’n bosibl. At hyn, mae’r cartrefi newydd hyn yn bodloni ac yn rhagori ar safonau rheoleiddo presennol Safon Ansawdd Tai Llywodraeth Cymru, Gofynion Safon Datblygu Llywodraeth Cymru a Safonau Mannau a Chartrefi Prydferth Llywodraeth Cymru.