Ymwelwyr Pluog yn codi calonnau mewn Cartref Gofal ym Mae Colwyn

Roedd pawb yn wên o glust i glust yr wythnos hon pan groesawodd preswylwyr cartref gofal Merton Place ymwelwyr bach pluog, a’r plant ysgol a wnaeth helpu i’w deor!

Mae disgyblion ysgol Rydal Penrhos, ger cartref gofal Merton Place ym Mae Colwyn, wedi bod yn cadw golwg barcud ar yr wyau yn neorydd y dosbarth, ac yn cyfrif y dyddiau nes i’r cywion gyrraedd. Pan ddechreuodd yr wyau gracio, a daeth y cywion bach melyn i’r golwg, roedd y plant yn awyddus i rannu’r hwyl gyda’u ffrindiau oedrannus yn Merton Place.

Yr ymweliad hwn oedd y diweddaraf mewn cyfres o weithgareddau pontio cenedlaethau rhwng plant grŵp ‘Little Movers’ Rydal Penrhos a phreswylwyr Merton Place. Mae’r ymweliadau yn gyfle i’r plant a’r preswylwyr oedrannus fwynhau sgwrs, gan ddysgu a chael hwyl ar yr un pryd.

Roedd amseru’r cywion yn berffaith! Gyda’r gwanwyn ar ei anterth a’r Pasg ar y gorwel, mae’r cywion yn symbol cryf o fywyd a dechrau newydd.

Wrth i’r cywion dyfu, byddant yn cael eu symud i erddi Rydal Penrhos, lle byddant yn dod yn rhan o gymuned yr ysgol. Mae disgyblion Rydal Penrhos yn cymryd rhan mewn amrywiaeth eang o weithgareddau addysgol, a gall preswylwyr Merton Place edrych ymlaen at ragor o ddatblygiadau cyffrous diolch i’w hymwelwyr ifanc.

I gael rhagor o wybodaeth am fyw yn Merton Place, ewch i: Merton Place – Clwydalyn